Bialtu MLA hoin lei tlahniam an tlawh

Vawiin (26.6.2025) chawhma khan Aizawl West-II Bialtu MLA Lalnghinglova Hmar, MoS chuan Vaivakawn, Zohnuai-a lei tlak hniamna hmun a tlawh a, vengchhung mite nen inkawmin  sawrkar hmalaknate a hrilh a ni. Helai hmuna lei che thin hian vantlang kawng a tih chhiat bakah Vaivakawn Thlanmual atanga  Sairang Road (NH-6) thlengin a awh thla a ni.

Lalnghinglova chuan thu sawiin, Vaivakawn, Zohnuai lei tla hniam thin siam tha tak tak tur chuan a bulthut, lui dung atanga lei tawlh tur danna Check Dam siam a ngaih thu a sawi a, 'Thil hautak tham tak a nih avangin tun dinhmuna thil tih theih awm chu chhiatna zualpui thleng thei laka invenna tura hmalak a ni,' a ti.

DM&R, PWD leh Geology & Mining Department-te  hmalakna hrang hrangte sawiin Bialtu MLA chuan, 'Zohnuai lei tlahniam thawm thatna tur atan hian SASCI atangin cheng vbc. 3.84 hmuh a ni tawh,' tiin tui kawng mumal zawk, side-drain leh linked-drain te, gabion leh retaining wall-te siama a rang thei ang bera hmalak nghal a nih tur thu a sawi.

Malsawmdawnglian, Geologist, Geology & Mining Department chuan, Vaivakawn, Zohnuai lei chet dan chu DGPS khawl hmanga an thlithlai reng thu sawiin, lei (soil) sakhat dan chungchang zirna pawh neiin lei verh (bore hole) pawh hmun 6-ah an neih thu te, hmun thenkhatah chuan lei hnuai feet 50 bawr velah lei sakhat an hmuh chauh thute a sawi a ni.