Kan himna danpuiah a innghat - CM

Nimin (26) khan Govt. of India, Ministry of Culture kaltlanga nimin atanga hman tan Samvidhan Hatya Diwas (Constitution Murder Day) chu Art & Culture bultumin Vaivakawn Cultural Centre-ah hman a ni a, Chief Minister Pu Lalduhoma'n khullian niin a hmanpui.

Chief Minister chuan India danpui hnuaiah kan hnam leh sakhuate humhimna fel tak a awm tih sawiin, 'ILP kan nei bawk a, India Sawrkar hnuaiah hian Zofate hi kan him a ni – tiin ka sawi thin. Article 371G ah kan inhumhimna (special provision) fel taka dah a ni a, Eastern Bengal Frontier Regulation Act 1873 hmangin Inner Line Regulation leh non tribal-ten kan ramah ram an neih ve theih lohna a awm bawk. Danpuiin min humhim tlat avang leh democracy lungphum – zalenna – kan neih avangin he ramah hian kan him a ni, kan ti mai a ni. Kan himna leh him lohna chu kan danpuiah a innghat. He dan hi palzut a nih chuan engkim a lo derthawng nghal mai ang. Tin, 6th scheduled, kan tana tha em em kha kan ADC pathumah chauh a lo nung ta si a. Tih nun thar leh a tha lawm ni tia inrawnkhawmte hi a tha hialin ka hria,' a ti.

Ram danpui hi tihdanglam theih loh a ni lo tih sawiin Lalduhoma chuan, 'Vawiin thlengin vawi 106 vel amend tawh a ni. Amend theih danpui a nih miau avangin, a tha zawnga hman theih a ni a, kum 1975-a Emergency puanna thu 'internal disturbance' tih pawh 'armed rebellion' tia thlak (amend) niin a tha em em a ni,' tiin amend theih a nihna hi a chhe zawnga hmang duh ruling party an lo awm erawh chuan kan himna hi tihchhiat theih a nih thu a sawi.

Chief Minister chuan tuna sawrkar mek hian kum 1975 a emergency lo puan tawh ang kha an duh lohzia lantirna he Diwas hi a hman a nih thu sawiin, 'Kan ram danpui leh democracy tundin an duhzia an tilang a ni. Chutiang rilru pu an nih avang chuan ngaihngamin kan awm thei ang. Amaherawh chu kan mit leh beng kan chhit reng erawh chu a ngai thung. Kan zirlaite leh thangtharten kan ram leh hnam himna hi engtik lai mahin kan ngaihthah tur a ni lo,' tiin a chah.

Sorkar thuchhuah tarlan danin, June 25, 1975 khan khatihlaia India Prime Minister Indira Gandhi chuan internal disturbances chhuanlamin Article 352 hnuaiah emergency a puang a, thla 21 zet a awh. Kumin hi a kum 50 na cham niin Central Sawrkar chuan hetianga hun hmang tur hian ruahmanna a rawn siam ta a ni.