PWD-in an hnathawh mekte an thlirho

Vawiin (13.6.2025) chhun khan PWD Minister Vanlalhlana hoin Mizoram PWD hnathawh kal mekte thlirhona (review meeting) chu Chief Engineer (Highways) PWD Conference Hall, Tuikhuahtlangah neih a ni. 

PWD Minister chuan PWD chu siamthat ngai laite theihtawp chhuaha siamthat tuma mawhphurhna a lak thu a sawi a, mahse a chhung a’n luhchilh takah chuan PWD chu mipuite’n sum tamna leh a thawktute pawh hlep ru tam ni-a an hmuh ang chu a nih lohzia sawiin, PWD inawpdan, inenkawlna leh tanrualna a thatzia te, tanpui ngai an awm pawha an intanpui tha hle ni-a a hriat thu a sawi.

Vanlalhlana chuan mipui tana theihtawp chhuaha hna thawktu an nih angin mipuiin an thlawp that avanga lawmawm a tih thu sawiin, mipuite tana theihtawp chhuah leh zel tur leh party tan lam nei loa tu pawh sorkar se sorkar tha taka thawhpui turin a fuih a ni. 

Aizawl traffic tawt lutuk tihziaawm dan tur PWD hotulute nen an ngaihtuah thu leh an hmalaknate chu sorkarah thlen a, sum hmuh theih dan tur ngaihtuah te pawh an hmachhawp thu PWD Minister chuan a sawi. 

Meeting-ah hian Commissioner & Secretary, PWD leh Engineer-in-Chief, PWD te pawhin thu sawiin, PWD engineer-te chu DPR siam lai atanga uluk tur te, quality-ah tan la tur te, contractor-te harsatna en uluk pui tur leh an hna a that phawt chuan bill pawh pe zung zung tur te, court case reng reng uluk taka zir chiang turte leh hma an lakna kawnga nakina court case lo awm thei tur laka fimkhur tur tein an in chah.

PWD-ah hian Engineer-in-Chief pakhat, Chief Engineer pali leh Chief Architect pakhat awmin circle 10 leh World Bank & Asian Development Bank Projects enkawltu PIU pakhat awmin Division 30 an awm.