GST hniam chhan sawifiah turin CM phut

Vawiin (13.6.2025) hian MNF chuan an office-ah chhung inkhawm an hmang a, thusawitu MNF General Secretary Lalremruata Chhangte chuan, 'Mizoram GST collection tlak hniam chhan Chief Minister-in sawifiah rawh se,' tiin a zawna thla nga chhung GST a tlanhniam chu thil pawi tak a nih thu a sawi.

Lalremruata Chhangte chuan, 'Kan state sum hmuhna hnar lian ber, sumdawngte leh contractor/ suppliers ten GST atanga sorkara sum an chhun luh nikum 2024 aia kumin 2025 a zawna thla nga chhung a tla hniam hi thil pawi tak a ni. 2023 MLA inthlan hma-a ‘keini chu kan danglam bik dawn' titu ZPM hian an sorkar hnuah hei hi an zawm chiang hle mai. India ram state hrang hrang zingah record ṭha lo tak siamin a zawna thla nga chhung GST collection-a kum hmasa pha lo awm chhun kan ni,' tiin kan danglam bik chiang hle niin a sawi.

GST atanga sum kan lakkhawm hi kumin hian 55 crores laiin an pha lo tih sawiin Lalremruata chuan, 'Eng vanga heti em em a tlahniam nge a nih, tih  hi a chhan kan zawn a ngai. MNF sorkar lai a hmasawnna hnathawhna tur, SASCI sum 233 crores an tih lapse atang ringawt pawh khan chhiah 41.94 crores sorkarin a hmu let theih tur a hmuhloh phah. Tin, ZPM hian an sorkar tuk atangin an duhsak zawng leh an party mite vulh nan departmental works hmangin cheng nuai sang tel man hna an pe a, GST chhun luh a theih si lova, ram hmasawnna tur tam tak a bo phah a, chhiah lut a tlahniam a, hei hi a chhan lian ber pakhatah a ngaih theih,' a ti.