Rukru dangdaite an nu tirh thin an ni

Champhai Police-te'n ni 10.6.2025 zinga Champhai khawpui chhunga veng hrang hranga rukru thin, an nu hoa an mante unau kha, kum 2 liamta vel khan an nu hian an unauin zing dar 1-2 velah kaithoin, an hmuh ang ang lakhawm turin a tir thin. A tirah rukrukin bul an tan loa, thirchhiate, bawlhhlawh paihna hmuna thil hmantlak la awmte an hawn thin.

A hnuah chuan miin leh dawr rawk tanin, in an rawk hmasak berah chuan thil lian tham an la loa, a hnuah an thil ruk a hlu chho telh telh a ni. Rinhleh an kai an hlauh avangin an veng chhung mite chu an rawk meuh lo. An thil tum an tih zawh zing dar 4-4:30 velah an haw leh thin a, engpawh ru haw se annu hian a hau ngai lo.

Chhungkaw pa ber chuan an sen laiin a thihsan a, unau rukru zinga upa zawk (hmeichhia) chu kum 21 a ni a, a naupang zawk (mipa) chu kum la tling lo a ni. Annu ho hian police-te chuan an man vek a, mipa hi chu kumtling lo a nih avangin Juvenile Justice Board hnenah an hlan.

Tarlan tawh angin, police-in an man takte hian thil an ru hnem tawh hle a, hralh atan erawh an ru ngai loa, an tan bakah midang tanpuina atan an ru thin. An thil ruk chhe tawh thirchhiaa hralh theih chi erawh an hralh ve thin.

Tum khat chu kohhran pakhatin guitar an mamawh tih hriain, kohhran dang a mi an ru a, a mamawhtu kohhran hi an pe a ni. An mamawh dan a zirin, dawr leh biak-in an rawk ber a, office pawh tum khat an rawk. An mamawh chin bak an ru meuh lo. 

An thil ruk thin thenkhatte chu chawhmeh, buhfai, inverter, drawer, thawmhnaw, make up, in chhung mamawhte a ni. Zing kar mi mut reh laiin an che ber thin.  Thil hi an ru khawm hnem tawh hle.

Ni 10.6.2025 khan tum khat an lo rawk tawhte chuan thawm hriain, man an tum bakah police an pun a, a mipa ber hi an man. A hnuah an in bulah a nu leh a fanu an chang a, an man leh a ni. An in atang hian an thil ruk thahnem tak hmuh chhuah niin, thenkhat chu a neituten an la let tawh.