Chief Minister-in YMA Day a hmanpui

Vawiin (14.6.2025) chhun khan Chief Minister Lalduhoma chuan a bial chhung khua Neihloh Branch-ten YMA Day an lawmna a hmanpui a, khawvel hmun hrang hranga awm YMA member zawng zawngte YMA Day chibai a buk.

Chief Minister chuan YMA chu a din tirh phat atangin tanpui ngaite tanpuitu, Zofate tana pawl tangkai leh zahawm a la ni reng tih sawiin, 'A hlutna hi a hniam thei lo. Mi thenkhatten YMA ropuizia hi an la hmu fiah lo a nih chuan lungngaihna leh harsatna an tawh niah an la hmu ngei ang. An fel vang emaw an that vang emaw ni lovin Zofa an nihna vang ringawtin YMA hian a la tuamhlawm dawn. An dam laia a tuamhlawm ta lo a nih pawhin an ruang tal chu zah takin thlanmualah a phum ngei ang,' a ti.

Tun hnaiah ruahpui vangin chhiatna kan tuar nasa a, chhiatna thlenna apianga tanpuitu langsar ber chu YMA-te an nih thu sawiin Lalduhoma chuan, 'An tanpuina dawngtu,  bikin hnam dangten nasa takin an lawmna thu social media lamah an rawn pho chhuak a ni,' tiin Mizo min tihmingthat thu a sawi.

CM Duhoma chuan kan ram leh hnam din chhuahna tur chu thawhchhuah tam tak nei ram kan nih a, hnam dangte mamawh pe thei khawpa kan san hun a nih thu sawiin, 'Chu dinhmun thleng tur chuan YMA member-ten hmathlir fel tak neia hna kan thawh a ngai. Kan ram siamtha tur hian hnam dangte an rawn kal dawn lo va, kan tu leh fate rawn tih atana dah chi pawh a ni lo. Keini, tuna chhuan awm mekte hian thlentir i tum ang u,' a ti.

Chief Minister hian Thenzawl leh a chhehvel ram thuta Peace City din tuma hma a lak dan pawh a tarlang a, 'Master Plan kan siam thuai dawn,' tiin a tak a chan hunah chuan Neihloh khawtlangin an chhawr hle dawn thu a sawi.