ISRO progarmme-ah Mizo naupang

Lalremruata Renthlei s/o Liantluanga Renthlei, Thenzawl, PM SHRI Jawahar Navodaya Vidyalaya, Thenzawl-a Class 9 zirlai chu Indian Space Research Organisation (ISRO)-in Young Scientist Programme (YUVIKA) 2025 a buatsaihah a tel. He programme hi India ram puma zirlai 350 chauh tana siam a ni. 

Programme-a tel diltu zirlai  98,000 atangin Lalremruata hi thlan chhuah zingah a tel a, Mizoram atangin he programme a tel thei pariatna a ni. Residential programme, kar hnih awh hi May 19 - 30, 2025 chhung khan Shillong-a North Eastern Space Applications Centre (NE-SAC) a neih a ni. 

NE-SAC ah hian space science leh technology lamte zirin, zirlaite hi Indian astronaut Angad Prathap kawmna hun siamsak an ni. Rohini-200 rocket kah chhuah lai a live-in an en bawk a ni. 

Hei bakah scientific leh cultural landmark-te an tlawhpuiin Guwahati Planetarium, Eastern Air Command leh Don Bosco Museum-te an tlawh tel.