Thenzawl Peace City sawiho

Vawiin (4.6.2025) chhun khan Chief Minister Lalduhoma hoin a office-ah Thenzawl Peace City Master Plan chungchang sawiho a ni. neih a ni a, K. Sapdanga, UD & PA Minister, Khilli Ram Meena, Chief Secretary leh official pawimawh dangte an tel.

Chief Minister chuan, Thenzawlah hian tuihna tha tak tak a awm nual a, furah phei chuan chenna in te a chim hial thin tih sawiin, 'Kan master plan-ah hian khaw lailia lui mawi tak, dil nalh tak leh a chhehvel ram mawi tak a awm ngei tur a ni. Sawrkar hmunhma, nakin zela kan la chhawr tangkai tur kan ruahman a ngai bawk ang. Tlang rama plan city, mawi leh khualzin hip tak, chenna atana duhawm si - ruahman ngei kan tum dawn nia,' a ti. 

Meeting-a tarlan a nih danin, tunah hian Thenzawlah hian mihring singkhat vel cheng anga ngaih a ni. Ram 108 sq. km. huam chhung velah plan hi siamin, urban area bik chu 82 sq km. ang vel tura chhut ni ta se; mipui bit zawng hi 100 persons per hectare a nih chuan mipui nuaih sawm vel chu thawl nuam takin an khawsak thei tur a ngaih a ni. A tul anga tihlen chhoh zel theih a ni bawk ang.

Agency rintlak leh hmingtha ngei thlan tum tlat ni se an tih bakah sawrkar atanga peace city buaipuitu tur bik Special Purpose Vehicle pawh din a rel.

Master Plan atan hian Ministry of Housing & Urban Affairs chuan Mizoram Sawrkar hnenah chrng vbc  10 a rawn phalsak a, a bul tanna tur cheng vbc. 1  (10%) chu an rawn release tawh. Plan siamtu tur agency thlan fel hunah 25% an rawn release leh ang a, draft DPR submit hunah 35% rawn release in final submit hunah 30% an rawn pe chhuak leh dawn a ni.

Thenzawl Peace City hmalakna hi Aizawl khawpui tawt lutuk tihziaawmna leh Mizoramin khawpui changkang zawk a neih theihna tura Chief Minister Lalduhoma hmalakna a ni.

Mawhphurhna a lak tirh atangin Central Sawrkar thuneitute vawi enge maw zat a sawipui tawh. Tunah hian master plan siamna turin cheng vaibelchhe 10 an rawn phalsak ta a ni.