Tung chingtu hlawhtling hmalakna tlawh

Vawiin (22.5.2025) chhun khan MPCC Sr. Vice President Lalnunmawia Chuaungo chan Serchhipa Congress Party hruaitute nen inkawmkhawmna hun an hmang. An party thuchhuah tarlan danin, MPCC Sr. Vice President hian Congress Party-in NLUP a kalpui atanga tung ching hlawhtling Rualzakhuma hmalakna a hmun a tlawh nghal.

Lalnunmawia Chuaungo chuan,  tunlaiin Mizoramin sum kan harsa em em tih sawiin, 'Sorkar pawhin tihngaihna tak hre lovin puk tur zawn chu a hna ber a ni mai. Hetih laiin ZPM Sorkar chuan kan ti ve lo ang an tih zawng zawng ti vekin mipui sum an chawma an hawp bawk laiin mipui thleng phak sum lengvak a tlem em em. Hei hian rukruk, tualthah, in rawk, ruang chhar, ruihhlo tawlh a ti hluar. Mahni taksa ngei social media-ah langsar taka zawrh nasa takin a ti hluar mek a ni. He'ng hi mipui hnen thleng phak lo sorkar kan hrawnin a rah chhuah a ni. Tunlaia Mizoram chhunga thil thleng chu chanchinthar ngaihthlak leh chhiar peihawm loh khawpin a tha lo hle a ni,' a ti.

Tung chingtu hlawhtling Rualzakhuma hmalakna a hmuna a tlawhnaah Lalnunmawia Chuaungo chuan, 'NLUP-in Mizoram chhungkaw tam tak dinhmun a khai chhuah nasatzia chu khawtinah zêp theih loh khawpin a lang. Pu Rualzakhuma'n tung oil bakah a herna fê (cake) leh a hnah leitha atana siama hralh chhuah tham an neih bakah chhungkaw tam takin an zara eizawnna an neih bawk avangin NLUP hi Mizoram tan malsawmna a ni,' tiin Pathian leh mipuite zara an sorkar leh hunah mi hniam leh harsa zawkte thleng phak NLUP changtlung zawk kalpui a nih tur thu a sawi.