Vbc. 5.08 man hu methamphetamine an man

CID (Special Branch) leh Special Narcotics Police Station tangkawp chuan methamphetamine cheng vbc. 5.08 man hua chhut an man.

Thulaknain a tarlan danin CID (Special Branch) leh Special Narcotics Police Station staff-te chuan an thudawn bawhzuiin ni 20.5.2025 (Pathianni) zing khan buara dah sawhthing phur 407 truck MZ 01 M - 1935 chu lo ti dingin, Aizawla CID Office tuala an endiknaah sawhthing hnuai, truck body-a thil thuhrukna an siamah methamphetamine pack 40, kgs. 39.151 a rit, cheng vbc. 5.08 hua chhut an man.

He thila mawhphurhtua ngaih Lalkrossmawia (41), Lepanchhawnga, tuna Khawmawi, Myanmar-a khawsak mek nia inchhal leh truck khalhtu Ramropuia, Tahan, Myanmar-te chu a hmunah an man nghal.

An chhuizuina atangin Lalkrossmawia hian anmahni escort turin taxi a hire a, Sakawrdai tluang taka a thlenpui chuan Rs. 50,000 pek a tiam. Methamphetamine hi Silchar panpui tum a ni a, Lalkrossmawia hi Myanmar-a amah chhawrtuten cheng nuai 1.5 hlawh turin an ruai thung.