YMA-in Lunglei SP sawn duh lo

YMA Sub-Headquarters, Lunglei chuan thuchhuah siamin tun hnaiah Lunglei District-a thuneitu sang tak takte sawn chhuah an ni tih tarlangin, 'A rawn thlaktute hi hnamdang vek an ni hlawm. Hei hian mipuite lung a ti awi lo em em a ni,' an ti.

Lunglei YMA tarlan danin, DIG Southern Range, February, 2025 maia superannuation pension-a chhuak tur chu hnamdangin a thlak. Deputy Commissioner, Lunglei chu thla li (4) awrh Lungleiah a awm tih chauhah sawn chhuah leh a ni a, Lunglei DC tur hian hnam dang bawk rawn dah a ni leh a ni.

Deputy Commissioner sawn thu-ah hian YMA Sub-Headquarters, Lunglei chuan min sawnsak lo turin sorkar-ah ngenna an thlen a, an hlawhtling ta lo a ni.

Chutih lai chuan, November 26, 2024 khan Lunglei SP atan hnamdang bawk dah a nihthu order a chhuak leh a ni. 

YMA Sub-Headquarters, Lunglei chuan hetiang taka Lunglei District thuneitu sang, tun hnai maia sawn an ni leh, a thlaktu atan hnamdang vek dah an ni hi lungawithlak loh an tih thu tarlangin, 'Lunglei SP atana hnamdang sorkarin a dahna order hi sût turin kan ngen a ni,' an ti. 

Mizoram Sorkar chu huvang chuan, Lunglei SP transfer order hi November 28,2024 tlai lam dar 4:00 ral hma ngeia sut turin thuneitute kan ngen a, an ngenna hi a hlawhtlin loh chuan a hlawhtlin nana hmalak dan tur zau zawkin an rel dawn. 

Thuneitu sanga hnam dang vek an awm tha an tih loh chhante chu:

* Lunglei District hi Mizorama District lian ber, hnam hrang hrang inchen pawlhna kan ni a, Mizo leh hnam dang inkara buaina chhuah fona district a ni. Law and irder-a harsatna a thlen nikhuain service-a tawn hriat nei tlem tak, DC leh SP-a an thut chuan buaina chinfel zung zung a harsa thin. District khata tawn hriat la nei tlem tak mai, Mizorama la post ngai reng reng lo, DC leh SP-a hnamdang an awm tur hi a thlamuanthlak loh kan ti.

* DC leh SP te hi mipui nen inngheng hnai tak an ni a. Mipui mimir, English leh tawng dang thiam lo pawhin an harsatna an thlen theihna tur post niin, Mizorama District training nei ve lo, Mizo hnam nunphung leh zia rang hre lo ve ve te SP leh DC-a an awm hi a tha lo.

* Kan duhthusam ang vek a ni thei lo tih kan hria. DIG-ah hnamdang, DC-ah hnam ldang kan nei mek a; SP-a hnam dang awm leh zel tur hi tha kan ti lo a ni.