Candidate tur tifel kim tep

MNF Party chuan kumin kumtawpa MLA inthlan lo awm tura an party candidate tur an tifel hnai a, bial 40 ah bial 38 an tifel tawh. MNF Nomination Committee chu vawiin (9.9.2023) chhun khan an thukhawm. 

MNF Nomination Committee zinga tel hnen atanga Bengvarna thudawn danin, bial hnih an la tihfel loh hi MLA an neih mekna bial Chalfilh leh MLA an neih lohna bial Aizawl South-II te a ni. Bial pahnihte pawh hi tihfel thuai beisei a ni. 

Chalfilh hi Assembly Speaker ni lai Lalrinliana Sailo bial a ni a, MNF ticket-in a ding nawn dawn em tih hriat a ni lo.

Hetihlai hian Hrangturzo Bialtu MLA ni lai Lalchamliana, Home Minister chu din a tum tawh loh avangin a aia ding turin MNYF Vice President hlui Lalremruata Chhangte an ruat ni a hriat a ni.