Mizorama ration card dinhmun

Mizoramah ration card 2,85,026 a awm mek a, hetihlai hian chhungkaw tam tak chuan rinna thil avangin ration card an nei lo. Ration card 2,85,026 ah hian mihring 11,64,005 hming a chuang. 

Mizorama ration card tam ber priority household (car hring) niin, 1,44,320 a awm a, a dawttu Non NFSA (card var) awm zat chu 1,14,966 a ni.

Ration card chi thum zinga Mizorama tlem ber chu AAY (card eng) niin, 25,730 a awm. AAY hi mirethei zualte tana tih niin, buhfai an leina rate pawh card dang neite aiin a tlawm.

Mizoramah rinna avanga ration card nei lo eng emaw zat an awm a, a zat erawh Supply Department lamin an chhinchhiah lo. Hetihlai hian rinna avang ni kher lo, subsidy-a buhfai lak tul tih loh avanga ration card-a inziaklut lo leh nei lo pawh an awm. 

Supply Department atanga thudawn danin, rinna avanga ration card nei lote hian ration card neih duh mah se, ration card nei tura neih ngai Adhaar Card an neih duh loh avangin an nei thei lo. 

Supply Department hian ration buhfai lak tul ti kher lo, document atana ration card duh si te chu a hranin ration card an siam sak thei.