Vaphai lamah raltlan an pung nasa

Myanmar-a Chinland Defense Force (CDF) camp luh chhuahtu Chin National Defense Force (CNDF) camp Chin National Army (CNA)-in an kah ve thung vangin vawiin (6.7.2025) ah Vaphaiah raltlan an rawn lut nasa hle a, Vaphai khawtlang hruaituten an buaipui.

Vaphai atanga Bengvarna thudawn danin, vawiin chhun lam atangin an khaw ep CNDF lam atangin CNA lamin an camp an kah thu an dawng a, helai chhehvel khaw pathum atangin raltlan an lo lut tan. Raltlante hi Saikhumphaiah lo dawn sawn an ni a, chhin chhiah zel niin, an awmna tur ruahman sak an ni.

Raltlante hi he thuziahlai thleng hian mipui 610 bakah CNDF sipai 8 leh an mi man (Myanmar sipai) pasarih an ni. Raltlan hi an awm belh zel rin a ni.

Tarlan tawh angin, CNDF-te hian niminah Khawmawi lama CDF hmunte beiin, an lak sak a, CDF control thin Tiaua in sumdawn tawnna pawh an control tawh. Zokhawtharah raltlan 2,000 chuang an lut tawh.

Vawiinah CNA-in CNDF lam beive thungin, Vaphai lamah raltlan an pun belh ve leh a ni.