NHIDCL ED-in thudik lo a sawi - ZPM

ZPM chuan thuchhuah siamin, NHIDCL Executive Director Virendra Kumar Jakhar chu thudik lo sawiah puhin, Chief Secretary Khilli Ram Meena chuan thudik puang chhuak tura NHIDCL-te a hriattir thu an tarlang.

ZPM chuan Vairengte leh Sairang inkar kawng, National Highway – 06 chu Ministry of Road Transport & Highways (MoRTH), Govt. of India chuan July 3, 2020 khan gazette chhuahin Mizoram PWD enkawlna hnuai atangin NHIDCL enkawl turin a tih thu tarlangin, 'NHIDCL lam hian 4 lane kawng turin hma a la nghal. July 3, 2020 a gazette chhuah laia hnathawh laklawh a awm avanga PWD kuta la awm pahnih - Bilkhawthlir to Kolasib (25km) leh Kawnpui to Khamrang (15km) te pawh NHIDCL kutah a awm tawh a (Minutes of Meeting between Hon’ble Minister (RT&H) and Hon’ble Chief Minister, Mizoram (S.No. 4.2.2) dated 28th May, 2025),' an ti. 

October 18, 2024-a Chief Minister hoa meeting-in a rel angin, PWD chuan January 3, 2025 khan NHIDCL hnenah hand over documents a hlan tih tarlangin ZPM chuan, 'Hei hi Bilkhawthlir to Kolasib (25km) leh Kawnpui to Khamrang (15km) kawngte hlan chhawn ni-ah ngaih a ni. PWD-in January 3, 2025-ah he lai kawng hi NHIDCL ah hand-over tawh mah se, Mizoram Sorkar chuan a ngaihthah ngai lova, NHIDCL ten maintenance contractor an dah luh hma chu,Chief Minister-in sum awm ang angte a ngaihtuah,' tiin chawl loin Zoram mipuite tan vawiin thlengin kawng chhe zual lai siam reng a nih thu an tarlang.

ZPM chuan July 3, 2025 (Ningani)-a pawl pali - Mizoram Transformation Movement (MTM), Centre for Environment and Social Justice (CESJ), Mizoram First (MF) leh Citizens Alliance for Truth and Social Justice (CATAJ) ten NHIDCL Executive Director Virendra Kumar Jakhar a pisaa an hmuhnaah; Mizoram PWD hnen atangin Khamrang leh Kawnpui inkar leh  Bilkhawthlir leh Kolasib inkar chu an enkawl tura an la lak chiah loh thu leh, PWD kuta a la awm angin thu dik lo a sawi tih tarlangin, 'Mizoram Sorkar tihmualpho a tum hi kan duh lo tak zet. Tin, he dawt sawi hmanga heng NGO 4 ten PWD Minister leh PWD-te dawt sawiah puhin, an chirh theh nghal mai hi pawi kan tiin, a dik zawk puang chhuak turin kan phut,' an ti.

ZPM tarlan danin, Chief Minister leh PWD Minister Vanlalhlanaten hemi chungchangah hian hmala nghalin; Chief Secretary Khilli Ram Meena chuan vawiin July 4, 2025 (Zirtawpni) khan a pisa-ah PWD hotute leh NHIDCL hotute a ko a, NHIDCL hotute chu thu dik tawk lo hmanga Mizoram Sorkar an puh mai chu ṭha lo a tih thu hrilhin, thu dik puang chhuak thuai turin a hriattir a ni.