MUHCS-ah chhungkua 2,97,516

Mizoram Universal Healthcare Scheme (MUHCS)-a inziahluh theih hun chu June, 2025 khan a tawp a, chhungkaw 2,97,516 vel an inziaklut. Mipui zingah inziaklut an tam lo.

Tarlan tawh thin angin MUHCS-ah hian PMJAY benificiary-te chu a hranpaa inziahluh a ngai loa, an vaiin chhungkaw 2,19,000 an ni. A hranpaa inziahluh ngai lo tho sorkar hnathawk chhungkaw 43,470 MUHCS hnuaiah hian an awm. Pensioner zingah chhungkaw 10,057 an inziaklut a, Centrally Sponsored Scheme (CSS) hnuaia thawk chhungkaw 12,000 vel an inziakluta ngaih niin, a zat chiah a la chiang lo.

Mipui chuan chhungkaw 12,989 an inziaklut a, Rs. 2,500 manah chhungkaw 11,283; Rs. 5,000 manah chhungkaw 1,088 leh Rs. 10,000 manah chhungkaw 618 an inziaklut a ni. 

Hetihlai hian, ruahman lawk angin MUHCS-a inziahluh theih hun (grace period) chu August, 2025 chhung hawn a ni leh dawn a, a hmaa chawi ngai zat let chawi a ngai tawh dawn thung.