Kawnpui - Sairang inkar kawng siam hnatlang titawp

Mizoram Tipper Association (MTP) District Headquarters, Kolasib chuan Sairang - Kawnpui inkar kawng chhe zuallai siamthat hnatlang an neih chu zanin (1.7.2025) atangin tihtawp a nih tak thu an tarlang a, 'Thuneitu lamin a tihngaihna ngang an hriat tak loh avangin lirthei a eizawng pawlte chuan hnatlangpui hi kan ko ta mai a ni,' an ti.

MTP thuchhuah (a ngai ngaiin)

Mizoram tana kawngpui pawimawh ber Kawnpui leh Sairang inkar (NH-306 & 06) a HNATLANGPUI neih, MTA Dist. Hqrs. Kolasib huaihawt a neih chu Dt. 26.06.2025 (Ningani) atangin vawiin Dt. 01.07.2025 (Thawhlehni) thleng hian hlawhtling taka neih a ni. Lung chatlak avangin Dt. 28.06.2025 (Inrinni) leh Dt. 30.06.2025 (Thawhtanni) chu lung thiar nan a hman a ni.

Helai kawng kan chak lakna pui ber hi lirthei bungraw phur a tlan te tan a him lovin motor tam tak a tlu tawh a, motor tam takin a chhiat phah bawk a ni. Thuneitu lamin a tihngaihna ngang an hriat tak loh avangin lirthei a eizawng pawl te chuan HNATLANGPUI hi kan ko ta mai a ni.

Hnatlanna atana tha leh zung, sum leh pai leh lirthei rawn thawhchhuahpuitu zawng zawng (MTA Dist. Hqrs. Kolasib, MTA Gen. Hqrs., AMCTA) members te, Sub. Hqrs. YMA Kolasib, Awithangpa Group YMA, Khamrang khawtlang mipui te, Kawnpui Town Driver Association leh Pawl hrang hrang te leh mimal sum leh pai hmanga thlawpna tha tak kan dawn avangin lawmthu kan sawi a ni.

All Mizoram Commercial Tipper Association ten lung Dt. 01.07.2025 (Thawhlehni) hian hnatlang kovin lung trip 11 lai mai Aizawl atangin an rawn phur thla a ni.

Dt. 30.06.2025 (Thawhtanni) khan a changtu PWD Minister hmuh a ni a, thu lawmawm tak hmuh tur erawh a awm lem lo. Chutih rualin lung trip 40 an rawn thawh ve tur thu a sawi erawh lawmawm kan ti a. Heng lung te hi a rang thei ang ber a kawng hnawh nana rawn hmang tur leh, hnatlan leh ngai kher lova a tul anga bawhzui turin kan phut tlat bawk a ni.

Hnatlan chhung hian mipuite tawrhna nasa zawk a thleng ang tih kan hlau hle a, Dt. 28.06.2025 (Inrinni) zan dar 8:00 p.m atanga a tuk Dt. 29.06.2025 (Pathianni) zan dar 8:00 p.m khan lirthei tangkhang, a ruak a chhuk thla lam te chhuah phawt a ni. Dt. 30.06.2025 (Thawhtanni) zanlai dar 12:00 midnight khan Gas phur leh Oil Tanker te chhuah leh an ni.

Khua in min bumro tak avang leh duh ang a hmanrua a awm tam theih tak loh avangin duhthusamin kawng hnawh kan tum pawh chu kan ti thei a ni ta lova. Dt. 01.07.2025 (Thawhlehni) tlai lam dar 8:00 p.m hian HNATLANGPUI chu tih tawp niin, lirthei tangkhang zawng zawng te pawh chhuah an ni.

He hnatlangpui kan neih chhunga ZORAM MIPUI ten min thlawp tlat avangin lawmthu kan sawi e.