Police Station kawtah mipui an pungkhawm

Champhai Bethel Veng mipuite chu an veng mi Pausianmuanga (28) tualthihnaa inhnamhnawiha puhte bail-in chhuah an ni dawn nia hriain, lungawi lohna lantirna atan Champhai Police Station kawtah vawiin (4.7.2025) hian an pungkhawm.

Champhai Bethel Branch YMA-in an thuchhuaha an tarlan danin PS Muanga thihna chungchanga thil tisualtute chu bail-a chhuak mai tur an ni a, hei hi Champhai Police-te hmalak chak tawk lohnaah an ngai.

Punkhawmnaah hian police-te'n ni 90 chhunga PS Muanga thihna chungchang report (chargesheet) court-a thehluh a nih loh vangin pawi khawihtua puhte bail-a chhuah an nih dawn thu tarlan a ni

Champhai Police-te chuan March 29, 2025 zana Pausianmuanga (PS Muanga), Champhai Bethel Veng thihna chungchangah mi pakua an man.

Pausianmuanga hi Chhangphut Field gallery atangin a thlang lamah tla thla a, damdawi in panpui a nih hnuah a hliam tuar loin a thi. He thil thleng chungchangah hian FIR thehluh a ni.

He thihna thleng chungchangah hian insual rawnna a thleng ngei nia hriat a ni a, a mawhphurtua puh mi pakhat Lalruatthara, Champhai Kanan Veng nia insawi chu March 29 zan khan Champhai Police kutah a in pe.

Champhai Police-in an chhui zuina kal zelah thu zawhfiah turin mi pariat an man belh leh tawh.