Lunglei Ni hman dan tur sawiho

Lunglei Municipal Council (LMC) ruahmanna-a 'Lunglei Ni' hman tur atana LMC Executive Council-in hmalatu tur Organising Committee a din chu vawiin (1.7.2025) chhun khan Lunglei Convention Centre-a LMC BoC Hall-ah a ṭumkhatna atan an ṭhukhawm.

June 6, 2025-a LMC Board of Councillors ṭhu khawmin 'Lunglei khawpuia cheng, ṭhang leh thar zelte'n Lunglei khawpui hmangaihna thinlung an put thar zel theih nan Lunglei puala ni bik hman' chungchanga inrawn khawmna buatsaih ni se a tih angin, June 16, 2025 khan inrawnkhawmna hi buatsaih a ni.

Inrawnkhawmnaah hian 'Lunglei Ni' hman chu ṭha tih a nih angin LMC chuan Organising Committee a din nghal. Organising Committee-ah hian LMC Chief Executive Officer (CEO) Donny Lalruatsanga chu chairman niin, co-chairman-ah Lunglei Sub-Headquarters YMA President K. Lalfakzuala leh secretary-ah Sub-Headquarters YMA Secretary Zothanzuala Hnamte ruat an ni. Sawrkar official-te, pawl hrang hrang ai awhte leh Lungleia mi hmingṭha leh langsar ṭhenkhatte chu member-ah ruat an ni.

Organising Committee chuan Lunglei puala ni bik hman tur hi a hmingah 'Lunglei Ni' vuah ni se, an ti. A hman hun chhung atan mei mit lova Lunglei luah ṭan a nih hun nia hriat, March 1889 thlir chungin February - March, 2026 tin zawn a ni. Lunglei din ni chungchanga chhinchhiahna awm sa nem ngheh nan National Archive-ah lehkha pawimawh leh chhinchhiahna hluite hai a, zir chian ni se, chumi hnuah a ni tak tur chu la rel ṭhat ni se, tih a ni. 

Organising Committee chuan Lunglei Ni buatsaih tura mawhphurhna hrang hranga hma la tur committee peng hrang hrang an din. Hun hman dan tur chungchanga rawtna hrang hrang sawiho niin, mitin huap zo tur leh Lunglei khawpuia mihring chengte'n Lunglei hmangaihna kawnga hma an sawnpui ngei theih dan tura hun ruahman ṭha tih a ni. Hun hman dan tur chungchangah mipuiin ngaih dan leh rawtna an theh luh theihna tur an ruahman.