MoS-in Mizoram mamawh a thlen

New Delhi-a cham mek Minister of State Lalnghinglova Hmar vawiin (1.7.2025) chhun khan Narcotics Control Bureau (NCB) Director General bakah Ministry of Finance hnuai Department of Public Enterprises leh Ministry of Youth Affairs hnuai Department of Youth Affairs Secretary-te an office-ah a kawm a, Mizoram mamawh hrang hrang thlenin, thawhho theihna laite a sawipui.

Excise & Narcotics Minister Lalnghinglova Hmar hian NCB Director General Anurag Garg chu Mizoram a ruihhlo hluar do turin thawhho tha zawk neih a tul thu a thlen a, Myanmar ramri kaltlangin ruihhlo a lo lut nasa tih sawiin, intelligence-sharing leh thawktute training pek kawngah Mizoram Excise & Narcotics Department thuam chak a ngai tih a hrilh.

Excise Minister ngenna angin Mizoram leh Northeast state danga narcotics kaihhnawiha thawkte tan capacity building training an buatsaih tur thu NCB DG chuan a sawi a, Aizawlah NCB Zonal Office hawng tura ruahmanna a awm mek thu Lalnghinglova Hmar a hrilh. Myanmar aṭanga ruihhlo lo lut do kawngah tun aia inhnaih leh inpawh zawka thawhho dan tur an sawi dun nghal.

Sports & Youth Services Minister  Lalnghinglova Hmar hian Dr. Pallavi Jain Govil, Secretary (Youth Affairs), Ministry of Youth Affairs and Sports nen an inkawmnaah Department of Youth Affairs hnuaia thalai hmasawnna kaihhnawih activity hrang hrangte chu Mizoramah nghah ve thin nise a duh thu leh, Mizoram pawn atanga thalai tam zawk hip thei turin Aizawlah Youth Hostel sak a ngaih thu a thlen. Youth Affairs Secretary chuan a theih anga hma an lak tur thu a sawi a ni.

Tourism Minister nTetea Hmar hian Moses Chalai, Secretary, Department of Public Enterprises (Ministry of Finance) hnenah Mizoram chu state tê, budget pawh lian lo tak a nih avangin, hmasawnna hnathawh kawngah Central PSE-te kaltlanga puihna awm theite a sawipui.