Sikul kai tur an dang

Lungtian Joint Coordination Committee (VC Lungtian I, VC Lungtian II, Joint VC Lungtian, YLA Lungtian I Branch, YLA Lungtian II Branch, Joint YLA Lungtian, LWA Lungtian I Branch, LWA Lungtian II Branch) huaihawtin vawiin (9.6.2025) atang hian zirtirtu a aiawh tur dah loa tranfer a nih avangin an khuaa  Govt. Modern High School zirtirtu leh zirlaite sikul kai tur an dang.

Sikul kai tur dan hian rah tha a chhuah loh chuan ni 12.6.2025 atangin, total bandh huaihawtin, tiamchin awm loa BRTF kawngpui dan chah an tum.

Lungtian Joint Coordination Committee chuan Govt. Modern High School zirtirtu H Lalhmingmawia Govt. Aizawl High School-a transfer a nih chungchangah sorkarin ni 31. 5. 2025 ral hma a transfer order a sut lo a nih pawh in a aiawh regular teacher (mathematics zirtirtu) pe tura an phutah chhanna an la dawng lo mak an tih thu tarlangin, 'Khawtlang mipuite zah lohna leh zirlaite hmakhaw ngaih lohna lian takah kan ngai,' tiin an hmalakna turah hian khawtlang mipui leh khaw thenawmte tawiawmna an ngen.

Lungtian khua hi Lawngtlai District, Sangau khaw bula awm a ni.