CYMA hruaituten CM an kawm

Vawiin (9.06.2025) chhun khan Central YMA hruaituten Chief Minister Lalduhoma chu a pisaah an kawm a, thu pawimawh hrang hrang an sawipui.

Central YMA hruaituten YMA Rorel Inkhawm thurel, Mizoram Lokayukta hnuaia Investigation Wing siam chungchang an sawi pui a, The Mizoram Lokayukta Act, 2014 ( amendment) a Investigation tih lai paih tawh act a dah let leh tura ngenna an thlen nghal. Chief Minister hian lo en zui a tum thu a sawi.

March 15, 2025 a Union Home Minister Amit Shah lo zin tum a a tiam pahnih - Thingsulthliah a YMA rama conference centre sakna tur cheng vbc. 100  dilna kal zel leh Narcotics Control Bureau (NCB) kaltlanga ruihhlo dona tur sum dilna thehluh tawhte chu lo bawhzui a tum thu a sawi bawk. 

Central YMA hruaitute hian ruihhlo ngaite enkawlna atana Jordan Centre, Sethawn a mi chu cheibawl rawtna an thlen bawk.

CM hian Jordan Centre enkawl chungchangah sawrkar leh Kohhran te an indawr mek thu leh sawrkarin ruihhlo ngaite enkawlna turah ngaihtuahna a sen mek thu a sawi.

Kumin October thla a YMA Inkhawmpui Lian neihna tur Sakawrdai leh Mauchar inkar kawng pawh chak zawka siamthat hna kal pui a nih tur thu Central YMA hruaitute hi CM hian a lo hrilh bawk.

File Photo