Ramri venhim chungchang sawiho

Mizoram Security Coordination Committee-te chu an chairman Lalduhoma, Chief Minister hoin vawiin (9.6.2025) hian CM Conference Hall-ah an thukhawm. Vawi khat an thutkhawmna a ni. 

Meeting-ah hian Indo- Myanmar ramri dinhmun te, Indo - Bangladesh ramri dinhmun te, Mizoram leh a thenawm state ramri dinhmun te, ramri paltlanga ruihhlo leh ralthuam tawlhruk chungchang te leh hmalak zel dan tur thil pawimawhte an sawiho.

Tripura leh Mizoram ramri, New Kawnpui vela Tripura State Rifles ten temporary check post leh sentry shed an rawn siamte chu Chief Secretary leh DGP level-a inbiak a nih hnuah Tripura Rifles hian an hmunhmate tichhiaa an kalsan thu tarlan a ni. 

ILP chungchang te, One Nation One Ration Card anga Manipur atanga himna zawnga rawn insawnten ration card an neih ve vekna tur te, international tourist (khualzin) Mizoram rawn tlawh duhten permit rang zawk a an neih theih dan turte pawh an sawiho a ni.

Committee-ah hian Home Minister K. Sapdanga, Excise & Narcotics Minister Lalnghinglova Hmar, Chief Secretary Khilli Ram Meena, DGP Anil Shukla bakah Mizoram chhunga Sawrkar Laipui leh state hnuaia venhimna lam thawktu hrang hranga thuneitu sangte chu member an ni.