Tlabungah la dan chhunzawm zel

Govt High School Tlabung atanga mathematics zirtirtu sawn chhuah tumna a awm chu an duh loh avangin mipuiten ni 6.6.2025-a zirtirtu leh zirlaite sikul kai tur an dan hnuah, sorkarin zirtirtu a transfer chhuak tur a la dan chhunzawm zel a ni.

Tlabung Zodin VCP P Vanlallawma hnen atanga Bengvarna thudawn danin, vawiin (8.6.2025) chu Pathianni a nih avangin hnamdang an in duty chhawk. Zing atanga tlai dar 2 thleng Hindu Welfare Society an duty a, dar 2 atanga zan thleng Young Pahari Association-te an duty dawn a, zanah chuan Young Chakma Association an duty ang. VC-te chuan an uap reng dawn tho.

Sorkar atangin engmah thu lawmawm dawn an la nei loa, heivang hian zirtirtu transfer chhuak tur dan leh sikul kai tur dan hi an la chhunzawm zel dawn.

Tarlan tawh angin, Tlabunga tlawmngai pawl hrang hrang, tunhnaia thukhawm chuan Govt Tlabung High School-a mathematics zirtirtu sawn chhuah tumna chu an duh lo a, June 2, 2025 hma ngeiin transfer order sut turin sorkar an phut a ni.

Tlabung khawtlang hruaitute sawi danin, Govt Modern High School, Lungtiana mathematics zirtirtu chu Aizawlah transfer a ni a, hemi thlakna atan hian  Govt Tlabung High School-a mathematics zirtirtu chu transfer ve leh a ni.

Khaw dang buaina chinfel nana Tlabung an hmang chu Tlabung mipuite chuan duh loin, zirtirtu leh zirlaite sikul kai tur leh transfer tak chhuak tur hi an dang a ni.