Zirtirtu dan chhunzawm zel
admin 07-Jun-2025 04:21 PMGovt High School Tlabung atanga mathematics zirtirtu sawn chhuah tumna a awm chu an duh loh avangin mipuiten nimin (6.6.2025) a zirtirtu leh zirlaite sikul kai tur an dan hnuah, sorkarin zirtirtu a transfer chhuak tur dan chhunzawm zel a ni.
Bengvarna zawhna chhangin Tlabung Zodin VCP P Vanlallawma chuan sorkar atanga thu lawmawm an la hmuh loh thu sawiin, 'Nizan khan zirtirtu transfer tak chhuak tur tlaivarin kan dang a, duty tur in ruatin kan la dan chhunzawn zel. Sorkar atanga thu lawmawm kan hmuh hma chuan kan dang zel dawn, tlawm mai kan tum lo,' a ti.
Tarlan tawh angin, Tlabunga tlawmngai pawl hrang hrang, tunhnaia thukhawm chuan Govt Tlabung High School-a mathematics zirtirtu sawn chhuah tumna chu an duh lo a, June 2, 2025 hma ngeiin transfer order sut turin sorkar an phut a ni.
Tlabung khawtlang hruaitute sawi danin, Govt Modern High School, Lungtiana mathematics zirtirtu chu Aizawlah transfer a ni a, hemi thlakna atan hian Govt Tlabung High School-a mathematics zirtirtu chu transfer ve leh a ni.
Khaw dang buaina chinfel nana Tlabung an hmang chu Tlabung mipuite chuan duh loin, zirtirtu leh zirlaite sikul kai tur leh transfer tak chhuak tur hi an dang a ni.
