India air defence system a tha tawk

India leh Pakistan inkara inhmuhthiam lohna awm chuan reh lam aiin zual lam a pan zel a, nizan (8.5.2025) khan ram pahnihte hi ramriah silaia an inkah bakah, drone leh missile-in an in kap nasa hle.

Pakistan hian India ram hmun hrang hrangah drone leh missile eng emaw zat an rawn kap a, mahse hengte hian tih chhiat pawi tham a neih awm tarlan a ni lo. A chhan chu India air defence system lamin drone leh missile-te hi an tum ram an thlen hmain an lo kap thla chhar char a ni. Pakistan hian India radar-te rawn kah chhiat an tum a, mahse India air defence system a that tawk miau avangin an lo kap thla hman zel.

India air defence system hian Pakistan drone 50 vel chu a kah thlak sak nia hriat a ni. Pakistan hian drone leh missile hmangin theihtawp chhuah mah se, India air defence system a that miau avangin, hliam tuar pawh an awm phah lo nia hriat a ni.

India army-te chuan India beih tum Pakistan jet fighter pathum an kah thlak sak tawh nia tarlan a ni a, chungte US siam F-16 pakhat leh JF 17s pahnih niin media thenkhat chuan an tarlang. F-16 pilot phei chu India sipaite'n manin an kawl mek nia tarlan a ni.

India lam pawh a awm mai mai loa, thapui thawhin Pahalgam phuba lain theihtawp a chhuah mek zel a, Lahore-a Pakistan air defence system chu kah chhiat a ni tawh niin media thenkhat chuan an tarlang. Van sang leh lei lam bakah India chu tuipui lamah pawh in puah chah mup mup. Indo hi a la tawp maiin a rinawm loh.