KTP OB chetsual dan sawifiah

Tukin (4.11.2024) a Chawlhhmun Branch KTP hnatlanga a chetsual avanga thi Chawhlhmuh Branch KTP Finance Secretary Jonathan Laldingliana (35) h/o Jessica C Malsawmzuali chetsual dan chu hnatlanna-a tel ve Chawlhhmun Branch KTP Asst. Leader Lalthuhrilliana'n a sawifiah.

Chetsual dan sawifiahna :

'Tukina thingpui in chawlh kan neih zawhah, a chung lam (motor chhunga tangte) a mite an han che leh tan a, a hnuai, motor pawn lamah a lo zawntuten kan lo zawn bawk. 

Motor chhung atang hian mi pathum, Pu Mala, Puipuia leh Pu Senteate hian phek khat zelin an rawn nawr chhuak. An nawr chhuah chawlh zawk laiin amahin a phek khat hi a lo kuai kau a, chu chu a hnung lama a phek dang awm tlu khan a rawn delh hnan ta a, a hnung lama a phek dang awm nen a taksa a delh chilh ta a ni. A tân hun chhung hi second 30-40 vel a ni maithei. 

A bul hnaia awmten a delhtu nawr sawn an tum a, patling 5/6 velin an nawr let thei mai lo. Nawrtu an pung a, an han tang leh deuhvah khan a che ta a, a chet lai, an nem kau chiah tihin chhuatah a rawn tlu zawi ta hnawk a ni.

Pu Rammawia motor-in Ebenezer damdawi-inah kan kal nghal a, Vaivakawn kan thlen chhohvin a rawn thaw leh kâwk thin a, mu leh mal a nei lo tan. Seat hma atangin Hmingtea a rawn lehhawi a, keiin ka kuah bet a, Hmingtea'n tihharh tumin a hmaiah te, a malah leh a taksa remchang laiah a beng reng a, a harh zeuh lai chuan nikhua a hria, mahse, a mumal loh hun kha a rei zawk. Damdawiin kan thlen thlengin hetiang hian a awm tluan ni ber e,'

Tarlan tawh angin, Chawlhhmun Branch KTP chu tukin (4.11.2024) khan an kohhran biak inah an hnatlang a, hnatlannaah hian an Jonathan Laldingliana (35) chu chesualin, a hliam tuar loin a thi.

Chawlhhmun Branch KTP hi bungraw thiarin an hnatlang a, Jonathan-a hi chesual palhin Ebenezer Hospital panpui nghal a ni. Chawhma dar 10:15 khan a hliam tuar loin thi. Chawlhhmun Branch KTP-te chuan Jonathan-a hi an ui hle tih a tarlang.