AMC-in building kalh sak

Aizawl Municipal Corporation (AMC) Enforcement Committee-te chuan vawiin (5.12.2022) hian Chanmari Venga buidling pakhat dan  bawhchhia-a sak nia sawiin an kalh sak. He building hi Agape Multispeciality Hospital atana luah a ni. AMC tarlan danin he building hi Dinary T Azyu ta a ni. 

AMC Enforcement Committee tarlan danin, Dinary T Azyu hi ni 26.3.2019 khan residential building atan permission pek a ni a, ground floor bakah chhawng dang paruk sak remtihsak a ni. Kawng area lamah deviation a awm avangin LSC boundary pillar phun turin leh in sak lai ti tawp turin ni 17.7.2021 khan hriattir a ni.

Pillar a phun thu a rawn AMC-te a hriattir hnuah a hmunah enfiah a ni. A hma kawngpui an lama an LSC boundary-ah ban hmasa ber a awm, ban atangin cantilever beam tih chhuah tumin RCC framce an siam. Set back awm miah loin ban an phun tihna a ni.

Drawing anga a sak loh avangin ni 5.11.2021 ah insak lai angin OBPS-ah ni 15 chhunga submit tura hriattirna pek a ni. Tunah chuan ground floor bakah chhawng riat a sa tawh a, permission a neih chu ground floor bakah chhawng ruk sak phalna a ni.

A thenawm hnai chhungkaw parukin AMC Enforcement Committee-ah ni 28.7.2022 khan ziakin complaint an thehlut a, ni 4.8.2022 ah a hmunah enfiah a ni.

Ni 30.9.2022 ah dan a bawhchhiat avanga chawi tur leh a in sak mek chhunzawm tawh lo turin building neitu hi hriattir nawn leh a ni. Ni 2.12.2022 khan vawiina kalhsak turin order a chhuak a ni. Order bawhzui hian AMC Enforcement Committee-te chuan building hi an kalh ta a ni.