Myanmar kuhva vangin harsatna tawk

March 3, 2024 atanga dan loa Myanmar kuhva tawlh changa duty Bilkhawthlir Kuhva Chingtu Society-te chuan dan loa kuhva tawlh trip 17 vel an man tawh. Myanmar kuhva tawlh avanga an kuhva thar hralhna kawnga harsatna an tawh avang hian nikum khan cheng vaibelchhe 10 vel an hloh niin an chhut. 

Bengvarna thudawn danin, Myanmar kuhvate Union Home Ministry lamin India rama lakluh a khap hnuah Assam chuan Mizoram a thar chhuah kuhvate pawh Myanmar kuhva a ngaiin an state chhungah lakluh a khap a, hei vang hian nikum hmasa lam atang khan Mizorama kuhva chingtute chuan kuhva an hralhna kawngah harsatna an lo nei tawh a ni.

Bilkhawthlir kuhva chingtute pawh hi nikum hmasa lamah pawh khan Myanmar kuhva tawlh chang hian an lo duty tawh a, kuhva tawlh a ziaawm chho  nia an hriat avangin an chawlh san leh lai lawk a ni.

Hetihlai hian kuhva tawlh hi a tam leh nia hriain March 3, 2024 atang khan an member atanga duty insiam in chhun zan zawm in an duty leh ta a ni.

Bilkhawthlir Kuhva Chingtu Society Chairman H Malsawma chuan Myanmar kuhva avang hian an kuhva thar hralhna lamah harsatna an tawk tih sawiin, 'Assam Sorkarin an state a lakluh a remtih loh avangin kum danga rawn lei thin Vai ho an rawn lut tha ngam lo' a ti.

H Malsawma chuan hetiang  a nih avang hian kuhva an hralh chhun pawh kum dang angin an hralh to theih loh thu sawiin, 'Nikum khan cheng vaibelchhe 27 vel hmuh theih kan in beisei laiin a taka kan hmuh chu cheng vaibelchhe 17 vel a ni' tiin kum dangah chuan an kuhva te hi a par laiin kuminah chuan par tawh mah se, lei tuma lokal an awm lo niin an sawi. 

Bilkhawthlir Kuhva Chingtu Society Chairman sawi danin March  3 atanga an duty hnuah kuhva tawlh hi motor trip 17 an man tawh . Heng an kuhva mante hi police hnenah an hlan thin. A then erawh police lamina dah thatna an neih tawh loh avanga an tihral a awm.