Synod HSS-in diamond jubilee an lawm

Synod Higher Secondary School chuan vawiin khan an sikulah an kum 60-na, Diamond Jubilee an lawm a, Synod Moderator Rev.Dr Vanlalnghaka Ralte-in a hmanpui.

Jubilee lawmna chawhma lam inkhawm chu Principal Zirkungi Chhakchhuak-in a kaihruai. Synod Moderator chuan, Mizoram tan leh thlarau nun siam nan Mizoram Synod-in kum 1962 khan Synod HSS a din tih sawiin, 'He sikul aṭanga zir chhuakte chu ram leh hnam tan dinhmun pawimawh tak tak an chelh mek a ni,' a ti a; zirlaite chu Pathian ṭih chungin ram leh hnam tan tum neia zir turin a chah.

Chawhnuah Vice Principal PC Lalrinpuia kaihhruaiin hun hman a ni a; kum 10 chhunga HSLC leh HSSLC-a top 10-a lang leh subject topper-te hnenah chawimawina hlan a nih bakah, batch hmasa berte hnenah chawimawina hlan a ni. Synos HSS hnenah hian diamond jubilee pualin SHSS Alumni Association-in drum set an hlan bawk.

Synod HSS hian an Diamond Jubilee lawmna atan tun hnaiah thisen unit 207 an pe a; thawktute leh zirlaite'n Rs 82,500, buhfai ip 11 leh dailuah ip khat an thawh khawm chu Thutak Nunpuitu Team hnenah an pe tawh a ni.

Synod HSS hi kum 1962 khan din a ni a, thawktu hmasate chu - Rev. Lalngurauva, Upa Lal Thlengliana leh Upa C Pachhunga te niin, an zinga mi Upa Lal Thlengliana a la dam. Tun dinhmunah principal leh vice principal pakhat ve ve, zirtirtu 53, thawktu dang 12 leh zirlai 1,366 an awm mek a ni.