CM-in Mizoram mamawhte a thlen

Nimin (27.5.2023) hian Delhi-ah NITI Aayog Governing Council Meeting neih a ni a, Chief Minister Zoramthanga'n Mizoram mamawh hrang hrangte a thlen.

Chief Minister chuan Sustainable Development Goals Index 3.0 ranking chhuah hnuhnun berah state hma la tha 15 zingah Mizoram chu 12-na a nih thu tarlangin, 'Mizoram chu SDG hlawhtlinna tehna atana local indicator framework hmanga village legal local level a hma la hmasa ber state-te zing a mi a ni. Hemi kaihhnawihah hian Ngopa Village Council chu an thawhthat avangin best Gram Panchayat Award-in 2023 pek a ni,' a ti.

Mipui hmathatna turin leh a bik takin mahni kutkawih a eizawngte puiha tihhmasawn nan state flagship programme SEDP kalpui mek a nih dan Zoramthanga chuan, an eizawnna chawisan a nih a, an sum lakluh a lo tam zawk nan trade 52 laiah incentive pek a nih dante tarlang.

Chief Minister chuan state pum hmasawnna atana hmasawnna ruhrel lian tak tak din ngaihpawimawh a nih thu sawiin, 'Inkalpawhna lama hmasawnna - rel kawngte national highway leh a dangte chuan sumdawnna leh a kaihhnawih dangah hmasawnna a thlen tel zel  a ni,' tiin hmasawnna ruhrel daihrei tur dinna atana Sorkar Laipuiin Special Assistance to States for Capital Investment (SASCI) scheme a duang chu lawmawm a tih thu a sawi.

CM Zorama chuan SASCI chu state-te'n tangkai zawka an hman leh theih nan he scheme hnuaia part-I a kaihhruaina inziak thenkhat chu a aia khirhlo zawka siamthat ni se a duhthu sawiin, scheme thenkhat hnuaiah land acquisition atana a hranpa a sum dah a nih loh avanga harsatna awm thin chu sutkian ni se a tih thu a thlen.

Sorkar hmalakna leh bultum ngawr ngawr chuan hmasawnna hna zawng zawng a thawh theih vek loh avangin private investment uar tura hmalak zel a nih dan sawiin Chief Minister chuan, 'Mizoram chuan Ministry of DoNER-in North East Global Investors' Summit a kalpui mekah pawh phur takin hma a lakpui a ni,' a ti.

Zoramthanga chuan state chhunga healthcare infrastructure-in duhthu la sam tawk lo mah se, Mizoram chuan naupang 100% ah rotavirus hri danna a pekchhuah tawh thu leh, ram chhunga Infant Mortality Rate hniam ber a nih thu a sawi a, Lawngtlai Siaha, Serchhip leh Mamit District Hospital-te chu tihchangtlum a thuamthat mamawh a nih dan te, community health centre-te chu first referral unit ni tura tihchak a pawimawhnate a thlen bawk.

Hmeichhiate dinhmun chawikan kawnga Mizoramin hma nasa taka a sawn dan sawiin Chief Minister chuan, district tina working women hostel sakna tur sum pek mamawhna te sawi bawkin, sumdawng hmeichhia te'n an hman tangkai tur nau enkawlna (creche) siam tul thute a sawi bawk a ni.