Ruihhlo do hi kan manifesto - Lalrinpuii

ZPM chuan vawiin (16.6.2025) chhun khan an office-ah chhung inkhawm an hmang a, thusawitu Social Welfare Minister Lalrinpuii chuan ruihhlo do chu ZPM Party manifesto a nih thu leh home leh centre te mumal zawka kalpui turin an inbuatsaih thu a sawi.

Lalrinpuii chuan ruihhlo do chu ZPM Party policy a nih angin Pathian leh mipuite zara sorkarna an chan tirh khan Chief Minister kaihhruaina hnuaiah hmalak nghal a nih thu sawiin, 'State Level Ruihlo Do Committee lo muthlu tawh chu kaitho lehin hmalakna thuang hnih - supply reduction, demand leh harm reduction-ah kan then. Supply reduction lam hi Excise Department chan niin, demand reduction hi Social Welfare Department chan a ni Manifesto bawhzuiin thei tawpin hma kan la mek a ni. Nasha Mukh Bharat Abhiyaan leh National Action Plan for Drugs Demand Reduction scheme kan kal pui bakah Central Sorkar scheme ringawt kan ram tan a tawk loh avangin kohhran leh NGO-te nen tang hoin sorkar chuan theihtawp a chhuah mek a ni,' a ti.

Social Welfare Minister chuan home leh centre-te mumal zawka kalpui turin ‘The Mizoram Drug Treatment & Rehabilitation Centre Accreditation Rules’ hmang turin an inbuatsaih tih sawiin, 'Home hrang hrang enkawltute training kan pe a, anni pawh an inhawng hle. Aizawl khawpuiah ruihhlo avanga harsatna tawk an thahnem hle tih kan hria a, he harsatna sukiang tur hian 'Hulhliap, Short Stay Centre din ni se kan ti a, hetah hian ni 10 chhung chu doctor leh nurse-te enkawlna hnuaiah detoxification kalpui a ni anga, ni 5 dang Psychologist ten councelling an kalpui leh ang, ni 5 dang chu spiritual councelling neihpui tum a ni,' tiin Hulhliap atangin an dinhmun a zirin an chhungte hnena haw thei tura buatsaih a, la inpeih lo deuhte chu centre a awm chhunzawm thei turin ruahmanna an siam thu a sawi.