CADC CEM paihthlak a ni

Chakma Autonomous District Council (CADC) a BJP hruaitu,  Chief Executive Member (CEM) Molin Kumar Chakma chu vawiin (16.6.2025) a CADC Special Session-ah no-confidence motion hmangin CEM atanga paihthlak a ni.

ZPM member Doymoy Daveng Chakma chuan no confidence motion hi a pulut a, CEM Molin Kumar Chakma hian sorkarna chelh chhunzawm turin member a ngah tawk tawh lova,  hruaitu thlak danglam ngai a nih thu a sawi. Motion hi sawihona nghal niin, vote lak a ni.

Session-a tel elected member 17 zinga MDC 15 chuan motion hi an thlawp a, MDC 1 chuan motion thlawp lo zawngin a vote thung. MNF MDC awm chhun Rasik Mohan Chakma chuan vote a thlak lo. BJP hruaitu, CEM paih duhtu an tam zawk vangin, CEM chu paihthlak a ni.

11th CADC hi hian CEM a tan Rasik Mohan Chakma lakluh a nih hnuah, February 27, 2025 khan Molin Kumar Chakma hian a thlak a ni. CADC ah hian thlantlin member 20 awmin, Member pakhat thita ai thlan a la nih loh avangin tun dinhmunah member 19 an awm mek.

ZPM-in member 16 neiin, MNF member 1 leh BJP member pahnih an awm mek a, BJP member pakhat Nirupam Chakma chu session-ah hian tel lo.