CM-in DAJGUA Awareness Camp a hawng

Vawiin (16.6.2025) chawhma khan Planning & Programme Implementation Conference Hall-ah Chief Minister Lalduhoma chuan, tun thla chhunga kalpui tur Dharti Aaba Janjativa Gram Utkarsh Abhiyan (DAJGUA) Awareness & Benefit Saturation Camp a hawng. 

Chief Minister chuan, Mizoram mipui 94% aia tam hi tribal kan nih thu sawiin, 'State dangah chuan tribal-te hi hnam tlem zawk an ni hlawm a, keini ramah chuan hnam tam zawk kan ni. Chuvangin, Central Sawrkarin tribal-te hamthatna a rawn duan hi kan state pumpui hamthatna a ni nghal. State sawrkarin hmasawnna scheme a duan pawh tribal hamthatna tur a ni nghal zel,' a ti.

Kan dinhmun an rawn hriat avangin Sawrkar Laipui pawhin he awareness leh benefit saturation camp hi tha taka kalpui a, state dangte entawntlak khawpa tihlawhtling turin min beisei tih sawiin Lalduhoma, 'Min beisei ang ngeiin a mawhphurtu zawng zawngten tha taka hlen theuh kan tum dawn nia,' tiin a mawhphurtute a chah a ni. 

Chief Minister-in thu a sawi zawh hian kal khawmten zawhna an neihtee an zawt a, sawihona te an nei zui a ni.

DAJGUA hi Sawrkar Laipui flagship programme niin kum 2047 a India ram developed country-a hlankai tumna kalkawnga tribal mipuite zirtirna leh an mamawh zualpui pekna tura hmalakna a ni.

Sawrkar Laipui chuan a kalpuitu tur line department 17 a thlang a, heng line department te hian thawk hovin (convergence) India ram tribal awmna district thlanchhuah 549 ah te hna an thawk ang. Mizoram bikah chuan line department 14 ten district 11 a mihring nuai li vel huamin khaw 383 ah kalpui a ni.