Health Minister-in damdawi in a tlawh

Health Minister Lalrinpuii chuan tukin (12.7.2024) khan Lawngtlai khawpui chhunga damdawi in pathum - District Hospital, Lairam Christian Medical Centre & Hospital (LCMC&H) leh Christian Hospital Lawngtlaite a tlawh.

Health Minister chuan Mizoram health care system chu thapui thawha siamthat a ngai tak meuh tih sawiin, 'Sorkarin theihtawp a chhuah mek zel a ni. Tun dinhmunah  Health Department indaih lohna a nasa hle. Chak zawka hmalak mek zel a ni a, a tahtawla thil tih a ngaih thin avangin kan nghah thiam ve pawh a tul hle,' a ti.

Natna khirh bik enkawlna (critical care unit) ang chi pawh nei ve thei ngei tura hmalak a tul hle tih sawiin Lalrinpuii, 'A bik takin lung zai ngai (heart surgery) ah sorkar damdawi inah sum tlem zawk senga zai theih thuai a beiseiawm hle,' kal thlak (kidney transplant) pawh tih theih thuai a nih dawn thu a sawi.

Health Minister chuan in vitro fertilization (IVF) ti tura phailam pan reng ngai chu a veiawm hle tih tarlangin, 'Mizoramah ngei ti ve thei tura hmalak a tul a, rei loteah tih ve theih a beisawm hle. District Hospital, Lawngtlai mamawh tam tak zingah 'CT Scan' leh 'dialysis' khawl chu  dah thuai a ni ang,' a ti. 

Lalrinpuii chuan sorkarin kohhran damdawi in a ngaipawimawh takzet tih sawiin, 'A theihna apiangah sorkar chuan a tanpui zel dawn a ni. Private hospital-ah damlo inenkawl man a sang hle. Kohhran damdawi inah erawh man tlawm zawka inenkawl theih a nih avangin sawrkar pawhin a thlamuanpui hle,' tiin thlamuanpui tlak taka hna lo thawh chhunzawm zel turin a sawm.