Lunglei DC thu sawiin barakhaih

Mizoram Pig Farmer’s Association (MIPFA) chuan thuchhuah siamin,  Lunglei DC Ramdinliani'n ni 17.6.2024 (Thawhtanni) a Lungleia Expo buatsaih a hawnnaah, frozen vawksa fakmawiin 'tunhnaia frozen vawksa lei khapnate chu a tunlai tawh loin thliarkar rilru a ni'  tia a sawi thu chanchinthar (Zonet JB) lama lo lang tih tarlangin, 'Min barakhaihin, kan rilru a ti na hle,' a ti.

MIPFA chuan tun dinhmunah vawk pul hri (African Swine Fever) hi Mizoram hmun hrang hrangah nasa takin a leng leh mek tih tarlangin, 'Keini, vawk vulhtute pawhin he hri avang hian kan vawk vulh laite pawh thahnem tak kan chan leh mek a, hetiang a nih avang hian Mizoram Chief Secretary Dr. Renu Sharma, State Executive Committee, Mizoram State Disaster Management Authority Chairman ni bawk chuan  May 30, 2024 khan  Disaster Management Act, 2006, Section 24(1) tlawhchhanin 'thu leh awm hma zawng, Mizoramah vawk, a sa leh vawksa atanga siam thil eng pawh ramchhung state dang leh ram dang reng reng atang pawha lak luh khap tlat a ni' tiin thupek a lo chhuah tawh,' an ti.

Mizoram State Disaster Management Authority Chairman berin ram dang atanga vawk leh vawksa atanga thil siamte lakluh a khap laia Lunglei DC-in frozen vawksa a fakmawi leh vawk vulhtuten frozen vawksa lakluh an dodal mek laia an hmalakna a ngainep em ni tih theih tura tawngkam a nei chu pawi an tih takzet thu tarlangin MIPFA chuan, hemi chungchang hi a tul dan anga min enzui pui tur leh hma min laksak turin thuneitu sang zawkte an phut.

MIPFA tarlan danin, Mizoram State Disaster Management Authority Chairman-in May 30, 2024-a Disaster Management Act tlawhchhana vawk leh a sa bakah vawksa atanga thil siam eng pawh lakluh khapna thupek a tih chhuah laiin Lunglei DC chuan June 6, 2023 khan ASF hri leng mek chungchangah thupek ti chhuakin 'ASF len lohna state-a APEDA-in a pawmpui farm atangin vawksa atanga siam (frozen pork) lakluh phal a ni' a ti thung.