Apex Bank BoD an thukhawm

Vawiin (5.11.2024) chhun khan Mizoram Cooperative Apex Bank, Board of Directors Meeting chu Board Meeting Room-ah an thukhawm.

Apex Bank BoD thukhawm hian Special Deposit Scheme thar 'Sekibuhchhuak' tia a hming an vuah chu an pawm. He deposit scheme thar hi kum khata 7.5% a pung niin, kum upa tana 8% a pung thung.

Thawktu indaih lohna avanga hna lak thar (recruitment) exam tura kal meka assistant grade (clerk) 18 lak tura tih chu 27 ah tihsan a ni. JMG (officer) pahnih lak tura tih chu pathumah tihsan a ni bawk. Ni 14 December, 2024 a exam tur a ni ang. Recruitment Exam hi Indian Institute of Banking Management, Guwahati-in an buatsaih thin a ni.

Tun dinhmunah Apex Bank hian deposit cheng vaibelchhia 1,539.2 a dawn atangin loan cheng vaibelchhia 1206.1 a pe chhuak. Deposit dawn atanga loan pekchhuah tehfung (CD Ratio) hi 78.8% a ni.