Sports Minister lo chirhtheh tawh suh u - Denic

Asia Arm Wrestling International Cup 2024 gold medalist Denic Lalruattluanga, ITI Veng chuan ama chungchangah Sports Minister Lalnghinglova Hmar-in social media lama chirhtheh a hlawh chu tha a tih lo. 

Sports Minister hian vawiin (5.11.2024) hian a office-ah Denic-a bakah Asia Arm Wrestling International Cup 2024 silver medalist Benjamin Lalawmpuia Ralte leh Vanramnghakite lawmpuina hun a buatsaih. He hunah hian Denic-a chuan Sports Minister a fak. 

Denic-a chuan social media-a Sports Minister-in dem a hlawh chu tha ti loin, 'Hei hi khawngaih takin lo hria ula ka duh, a hma khan incentive cash award kan nei tawh loa, kan hun zawng zawng kan seng a, kan hnual em em a ni,' tiin Sports Minister thar hnuaiah arm wrestler-ten sports incentive cash award an neih leh tak thu a sawi. 

Sports Minister chirhtheh tawh lo tura mipuite chahin Denic-a chuan, 'Engkimah min pui a, min hrethiam em em zawk. Kan thatna ber tur a ngaihtuah tih lo hre rawh u. Arm wrestler-te min pui nasa em em,' tiin Lalnghinglova Hmar a fak. 

Sports Minister Lalnghinglova Hmar chuan Denic Lalruattluanga chuan incentive cash award a dawng thei dawn tih a sawi bakah, sorkar hna tur ngaihtuah a ni dawn tih a sawi. Silver medalist-te pawhin incentive cash award an dawng dawn.