MZP President-in Union MoS-ah a thlen

Delhi-a cham mek Mizo Zirlai Pawl (MZP) General Headquarters President H Lalthianghlima chuan vawiin (November 27, 2023) khan Union Minister of State for Minority Affairs John Barla chu a chennaah hmuin Mizo zirlaite tana thil pawimawh hrang hrang a thlen. MZP President hi Rajya Sabah MP K Vanlalvena'n a kalpui. 

MZP President chuan MoS Minority Affairs hnenah hian, Mizo zirlai tam tak khawsak harsatna avanga zirna sang zawk chhunzawm thei lo an tam thu a thlen  a, zirlaite'n hostel tam zawk Mizoramah an mamawh thu a hrilh nghal. 

H Lalthianghlima chuan PMJVK Scheme kaltlanga nasa zawk a zirlaite harsatna sukiang tura pui tura ngenin, hemi kawngah hian MZP pawhin theihtawp chhuah a zirlaite tan hma an lak thin thu sawiin, theihtawp chhuahpui turin a ngen bawk.

Mizo zirlaite thiamna leh theihnate haichhuah a nih zel theih na tura zirnaa hma an sawn theih nan an harsatnate sukiang tura hmalak a tul thu pawh MZP President hian Union Minister of State hi a hrilh. 

Rajya Sabha MP K Vanlalvena pawhin, zirlaiten hostel an mamawh nasat thu leh MZP chu Mizoramah chuan zirlaite eng harsatna zawng zawng buaipuitu an nih thute a thlen bawk.

MZP President hi NGO Co-ordination Committee hminga Mizoram Inthlanpui Vote chhiar hun sawn tura ngen tura Election Commission of India dawr tura November 17, 2023 a Delhi kal zingah telin, tunah hian Delhi-ah an cham mek a ni.