MUHCS-ah harsatna kan tawk nasa - FMGE&W

Sorkar hnathawk inzawmkhawmna FMGE&W chuan thuchhuah siamin, Mizoram State Universal Healthcare Scheme (MUHCS) hman rih loh an duh kal zelah minister-te nena an inbiaknaa sawrkar lam aiawhten rawtna an nei leh sawrkara thu thlen tura an relte an tarlang.

FMGE&W THUCHHUAH : 

Ni 1.5.2025 (Ningani) 3:00 PM-a FMGE&W General Council Meeting hmasa ber thuchhuak:

Ni 29.4.2025-a sawrkar lam aiawh Minister 3 te leh Mizoram sorkar hnathawkte aiawh, FMGE&W Office Bearer-tesawrkar hnathawkte medical reimbursement chungchanga an indawrna  report ngaihthlak a ni a, a hnuai a mi ang hi sawrkar hotute rawtna chu a ni:

1. Sawrkarin MUHCS  kalphung fello lai (system fello) ngaihtuah ṭha tu tur Committee a din anga, he Committee ah hian FMGE&W aiawh te an tel ve ang.

2. Sawrkarin committee a din chuan system fel tak a duan chhuah hma chu Sawrkar hnathawkte leh an chhungte chu khawi hospital-ah pawh an inenkawl thei ang. 

3. Sawrkar hnathawkte MR bill chu package rate awm lovin  damdawiina an senso ang ang Bill theih a ni ang. 

4. Sawrkar hnathawkte hlawh atanga contribution chu April 2025 atanga cut tura duan tawh angin cut ni se.

Sawrkar hotute rawtna hi ngun takin Council Member kalkhawmte'n kan sawiho. A hnuai a mi ang hian sawrkarah rawtna thlen nise kan ti:

1. Sawrkar hnathawkte medical reimbursement chungchanga sawrkar hotute rawtna ang hian kalpui ṭha kan ti. MUHCS hman ṭan a nih aṭang hian sawrkar hnathawkten damdawi ina inenkawlna chungchangah harsatna kan tawh nasat em avangin hemi chungchangah hian sawrkarin thuchhuah siam thuai se kan ti.

2. MUHCS hman ṭan ni, ni 1.4.2025 atanga sawrkar hnathawk zinga damlo mahni sum senga inenkawlna senso an bill let theih nan he thuchhuah hian huam se kan ti. 

3. Sawrkar hian MUHCS -a system fel lo lai zirchiang tu tur committee hi din ngei sela kan ti a, he committee-ah hian FMGE&W aiawhte telh ve ngei se kan ti.

File photo