Tualthattu ni ngeia an hriat a phu tawka hrem phut

Ramhlun Sports Complex khawtlang chuan January 22, 2026-a an veng nu Lalnuniangi (46) rawng taka thattu ni ngeia an hriat, Lalnuniangi pasal Lalmawia Kaipeng chu a phu tawk hremna pek an phut.

Ramhlun Sports Complex Local Council huaihawtin an veng mipuite chu vawiin (19.2.2026) chhun khan Aizawl District Court tualah an pungkhawm a ni.

He tualthihnaah hian Lalnuniangi pasal, Lalmawia Kaipeng chu mawhphurtu ni ngeia an hriat thu leh dan hnuaiah a na thei ang bera hrem an phut thu an sawi a, a chungthu rel a nih chhung chu bail-a chhuah phalsak lo turin thuneitute an ngen a ni.

Ramhlun Sports Complex khawtlang chuan, tualthattu-a puh Lalmawia Kaipeng chu an veng chhung rap leh tawh lo turin an hriattir a, a rap leh a nih chuan a chungah eng pawh thleng se mawh an phurh loh tur thu an sawi.

Dan anga Lalmawia’n hremna a hmuh theihna atan thuneitute thawhpui an huam thu leh thubuai chu a tawp thlenga an thlir zui reng tur thu pawh an sawi a ni.