CM-in thuneihna a pumbilh &#8211; Zodintluanga

Chhing Venga Congress Party unit hrang hrangte chuan vawiin (22.9.2026) hian intuaitharna hun an hmang a, an hun hmanpuitu MPCC Vice President Zodintluanga chuan Chief Minister Lalduhoma chu thuneihna pumbilhah puhin, Mizoram CM ni tawha hmasa ber a nihnate a sawi.

Zodintluanga chuan kum 2023 inthlan dawnah Lalduhoma chuan ‘thuneihna mi pakhatin a chan tam lutuk chuan hmansual a ni thin a, chuvangin ZPM chuan thuneihna insemzai kan kalpui dawn a, CM in party president nih a kawp a rem lo ang’ tiin a intiam tih sawiin, “Mah se, tunah chuan Pathian pawhin a thuthlung a thlak thin tia inthiam chawpin party president nihna a chang zui a, thuneihna a pumbilh der tawh a ni,” a ti.

MPCC Vice President chuan Lalduhoma chu Mizoram chief minister zinga ama lim hawng hmasa ber leh Mosia anga intehkhin hmasa ber a nih thu sawiin, “Tuhnai maiah Cabinet Meeting-ah Isua nen a intehkhin bawk a ni,” tiin Lalduhoma chu kan ram hruaitu lu ber a ni a, an khalh ngil theih hlauh takin a tih dik loh an sawi zel dawn a, chu chu Mizoram tan a nih thu a sawi.

Chief Minister Lalduhoma kaihhruaina chu kawngbo a nih thu sawiin Zodintluanga chuan, “Mipuiten kalphung thara kal tura kan la inpeih em em laiin ZPM Sorkar zawk chuan kalphung thara kal a tlin tawh lo zawk. Aizawl East-II biala hmasawnna ruhrel lian tam berte chu Congress hunlaia din leh sak deuh vek an ni,” a ti.