Saza kaptu nia puh an man

April 1, 2026 khan Aizawl Forest Division hnuaia Saitual Forest Range RO leh thawktuten Mualpheng khuaah Saza kap a, a sa rep te lo kawl tua puh mi pakhat an man.

Saitual Forest Range thawktute chuan an report dawn bawhzuiin pawikhawihtua puh chenna in hi an dap a, Saza sa ni ngeia rin hrang 39 lai leh a thin kg. chanve an man sak. He pawikhawihtua puh man hi hemi ni vek ni 1 April 2026 hian District Court, Aizawlah thubuai siamsak nghal niin, jail-ah dah nghal a ni.

Saza hi Wildlife Protection Act, 1972 hnuaia Schedule 1 ramsa zinga mi a ni. Schedule 1 ramsa te hi a lo tihlum emaw, a sa hrim hrim – a rep leh rep lo pawh – lo kawl emaw, satlaw chhar emaw pawh nise hremna lungin – Kum 3 aia tlem lo, Kum 7 thleng tan theihna leh pawisa cheng 25,000 thleng chawi theihna a ni.

Mizorama kan ramsa te tina lo tur te, kan tuchhuan lo awm lehzel turte tana humhalh leh venhimna kawnga hmasawn zel turtein EF&CC Department chuan Zoram mipuite a ngen.