Ruang phurh manah vbc. 1 chuang

ZPM Thalai chuan nimin (24.1.2026) khan Aizawl Press Club-ah press conference an nei a, an president Jeje Lalpekhlua, MLA chuan ruang phurh manah cheng vbc. 1.75 sorkarin a pek tawh thu leh an sorkar chhung chu ruang phurh man hi sorkarin a tum zel dawn thu a sawi.

Jeje Lalpekhlua chuan sawrkar hmasa hunlai kha chuan ruang phurh hi MLA candidate leh party-te inelna pakhat, politics khelhna chikhat kha a tling ve tih sawiin, “Hei hi ZPM Party a lo pian tirh phat atang khan tha tih lohna a lian hle a, hei vang hian policy-ah ruang phurh hi dahin, kan Sawrkar veleh Social Welfare Department chuan hma a la nghal ta a ni,” a ti.

Tun dinhmunah, Mizoram chhunga chhiattawkte ruang 1,680 chu ZPM Sawrkar chuan an phurh sak tawh tih sawiin Jeje Lalpekhlua chuan, “Ruang phurh na atan hian Rs. 175,85,602 hman a ni tawh. tunah hian ruang phurhna bill 80 process mek a ni,” a ti a, an sorkar chhung chuan ruang phurh chu kalpui chhunzawm zel an tum thu a sawi.