News

MZP hruaitute chuan vawiin (7.5.2026) hian Aizawl Press Club-ah press conference neiin, Mizoram Sawrkar hnuaia hnathawk pension tawh rawih nawn (re-employment) tunhnaia awm chungchang an ngaihtuah thu sawiin, “Tunhma atangin MZP chuan pensioner rawih nawn hi nasa taka dodalin, duh lohna lantir a lo ni tawh thin a, tuna pensioner chungchangah pawh hian MZP ngaihdan ála ngai reng a ni,” an ti.

Sawrkar hnathawk ruai nawn lo tura thuneitute an ngen reng laia MZP ngenna ngai pawimawh lo a, sawrkarin a ruai nawn chu Mizoram mipuite leh thalai hna zawng mekte zah lohna leh hmusitnaah an ngaih thu sawiin MZP hruaitute chuan, pension rawih nawnna order chu May 14, 2026 (Ningani) ral hma ngeia sut turin Mizoram Sawrkar thuneitute an ngen a ni.

MZP hruaitute chuan sawrkar hnathawk pension rawih nawn awm fo thin chu tunhma atangin tha a tih loh thu a lo au chhuahpuiin, pension tawh rawih nawn (re-employment) an nih avanga bang tura nawr pawh a lo nei tawh thin tih sawiin, “Chutiang thil thlen ngai lo tur chuan thuneitute pawh a tul anga hma la turin kan ngen nawn a ni,” an ti.

Sawrkar hnathawkte chu an hnathawh hun chhunga thahnemngai taka thawk turin ngenin MZP hruaitute chuan, pension hnuah erawh thalai hna zawng mekte kian tura an duh takzet thu an sawi.

DP&AR chuan ni 24.4.2026 khan notification ti chhuakin, ni 30.4.2026 a pension a chhuak tur R Lalrodingi chu ni 1.5.2026 atangin OSD to CM leh Tourism Director atana rawih nawn a nih thu an tarlang a ni.