Nov 14, 2025
Friday
MNF chuan vawiin (14.11.2025) hian an office-ah chhung inkhawm an hmang a, thusawitu MNF President Zoramthanga chuan, ‘Dampa Bial by-election ah chakna kan chang a, kan tih tur hmasa ber a nih angin Pathian hnenah lawmthu kan sawi a ni,’ a ti.
Zoramthanga chuan kum 2023 inthlanah ZPM thlipui a tleh tih sawiin, ‘Thawm pawh a la reh mumal lo a, chumi karah kan thawhhona, tanrualna leh inpekna Lalpa’n mal min sawm a ni. Kan MLA ropui tak Pu Lalrintluanga Sailo hmun ruak luah tura Dr. R. Lalthangliana, Sr. vice President, MNF thlantlin a ni hi kan lawm takzet a ni. Dampa Bial by-election ah invauna leh intihthaihna nen, thlémna nen CM hoin an bei a, an hotupa ber chuan Election Commission of India atangin yellow carda hmu ta. Hotupa ber leh candidate an tawng fuh hlei thei lo,’ tiin ECI-in CM leh ZPM President te zilhna thu a pek chu chanchinbu dang leh Vanglaini chanchinbu meuh pawhin langsar takin a chhuah zui thu a sawi.
MNF President chuan, MNF Party chuan a tirteah silai nen bul an tan thu sawiin, ‘Kohhran, YMA leh kan nu leh pate meuh pawhin min tan ngam tawh loh karah, a tlusawp tawh leh kehthem tete chu chhar khawmin bul tan leh a ni. Mipui pawhin hotute leh thawktute min sít pawh kha a awm em em a ni. Delhi lam atangin MNF chu a ral dan tur ngaihtuahin, Pu Laldenga chu Tihar Jail-ah an khung a, Pu Laldenga emaw an do an ti a, ‘Pathian leh kan ram tan’ tih thuthlung neitu zawk a ni an do tih kha an hre lo a ni. Kan chapo hlauvin kan opponent-te Pathian chuan a chawisang thin a, a hun takah MNF sut keh pawh nilovin, party 30 chuang zet chu anmahni an lo in sukeh tawh a ni,” a ti.
