News

MZP hruaitute chuan nimin (7.11.2025) khan Mizo hnam lam (Cheraw) mawi lo taka kaihlek vairal ta chungchangah a bul tumtu nia ngaih Mizorama cham mek Red Bull mi leh sate an office-ah an ko a, thil awmzia leh thil nih dante an zawtfiah.

MZP tarlan danin, Red Bull aiawha kalte hian Mizo hnam lam (Cheraw) mawi lo taka kaihlek a ni chu pawi an tih thu an sawi a, ‘He thila a mawhphurtu ber chu contract an ziahpui zing a mi cntent creator pakhat Yashwi Arora, Producer Red Bull India, a ni. Yashwi Arora hian tukin (nimin) zing dar 7 awr vel khan Mizoram chu flight hmangin a chhuahsan tawh,’ an ti.

Mizo hnam lam ti bawrhbang zawnga hma latu Yashwi Arora hian Mizo mipuite hmaah ngaihdam a dil ngei an phut tih tarlangin MZP chuan, “Ngaihdam a dil lo a nih chuan a tawp thlenga umzui kan tum,’ an ti a, Red Bull team-te chuan MZP duh dan anga Mizo mipuite hmaa ngaihdam a dil ngei theih na turin Yashwi Arora hi an lo biak tur thu leh mawh an lo phurh tur thu an sawi.

MZP chuan Mizo hnam ziarang (culture) tibawrhbang zawng leh ti-hmelhem zawnga chet lakna hi thleng nawn tawh lo se a duh a, hnam lam kan entir duh a nih pawhin uchuak tak ni loin Mizo mipuiten’a kan hriat dan, hnam lam dan dika lam entir thin turin Mizo mipuite a chah. Tuna Video darh mek pawh hi tidarh chhunzawm tawh lo tur leh delete hram turin Mizo mipuite an ngen nghal.