MZP hruaitute’n HM-ah rawtna thlen

Vawiin (30.10.2025) hian MZP hruaitute chuan Home Minister K. Sapdanga chu a office-ah kawmin, Mizoram Sawrkarin Inner Line Permit(ILP) dan an siamthat mekah rawtna an thlen.

MZP chuan ILP dan siamthat turah thu hlawm paruk – administrative efficiency, traveller access, digitalization, enforcement, penalty, leh sponsor mawhphurhna bakah Centralised Online ILP Portal siam a ngaih Home Minister hnenah hian an thlen a, ‘Aizawl–Sairang rel link tharah entry point lian counter tam zawk, staff training tha zawk leh diltute tan online helpdesk siam a ngai,’ an ti.

Online application hmanga system hi full digitalization, Aadhaar-linked verification, real-time tracking, leh permit dik leh dik loh enfiahna tur mobile apps hmanga siam bakah dan bawhchhiate mipui in an report theihna channel siam tura rawtna MZP hruaitute chuan thlenin, ILP hmang dik lo leh validity tawp tawh hnua cham hlen hremna tur bakah dan bawhchhia official-te pawn pawisa chawina hremna dan leh sponsor tute pawh limit siam sakin, an mawhphurhna tur rawtnaah hian an tarlang.

Home Minister chuan, ILP dan an siamthatna tura rawtna hrang hrang MZP hruaitute’n a an thlen chu tha a tih thu sawiin, an rawtna chu ngaih pawimawh a nih tur thu a hrilh.