MPCC-in CM hnenah lehkha an thawn

MPCC chuan vawiin (3.12.2025) hian Chief Minister Lalduhoma, Advisory Committee on Assam Rifle Land Chairman hnenah lehkha thawnin, Advisory Committee atangin an inhnuhdawh thu an tarlang.

MPCC chuan Mizoram Sorkarin Aizawl khawpui chhunga Assam Rifle-te ram chhuahsan hman
tangkai dan tur rel tur Advisory Committee a dinah an party pawhin sawm an nih angin aiawh an intirh thu tarlangin, “Mah se, Advisory Committee rorel dan leh min kalpui danah hian kan
party in hmathlir kan lo neih ve nen inpersan tak tak thuthlukna siam a ni ta zel. Kan party chuan sawlai ram awl chhungah sawn building lian mipui kalkhawmna ang chi hi dah loh nise tih hi kan duh dan a ni,” an ti.

Mimal leh pawl bakah sorkar pawhin office leh building dang pawh sak leh dah loh nise an duh tih tarlangin MPC Chuan, “Thingkung hrang hrang phun belh a, Aizawl Central Park cum Botanical Garden a tan a cheibawl leh khawpui min vangdai a boruak tha min petu a tan a buatsaih hi Aizawl mipui leh thalaite duh dan pawh ni ngeiin a lang,” tiin khawvel leh India ram khawpui dangte pawn an neih leh kan awh em em siam ve theihna hun leh hmun kan neih bawhpelha tihbawrhban loh hram an duh tih an tarlang.

MPCC chuan Lammual chhuanlam a kawngpui laih pawh chu thil tul lo leh sawlai hmun ti hmelhem
leh tiderthawngtu tur a ni dawn tih chu an hmuh dan a ni tih tarlangin, “Bazar Bungkawn bottle-neck tih ziaawm nan hmun thawveng leh tangkai zawk buatsaih nan Assam Rifle ho damdawi in tlang erawh saw chu hlan phal ila. Chhaklam nek thei ang ber leh zangkhai thei ang berin Multi-Level Parking sak nise, flyover hmangin chhimlam atanga lirtheri Armed Veng lam chhuk tur kaltir in sawlai traffic in nek buai zual saw a tih nep theih. Hemi a tan a remruatna hrang hrangte pawh en ho a ruahman theih a ni,” an ti.

Sorkar rawtna mai ni lo, pawl hrang hrang ten rawtna an neihte enho a, tunai a zauzawk a sawiho leh inrawn tlan a tul an tih thu tarlangin MPCC chuan, “Tin, a hmunhma humhim leh enkawl zel dan tur pawh tunai felfai zawk a siam vat nise. Heng a chunga kan rawtna leh duh dan te sawiho a hmalak chhunzawm theih nise kan tiin, chuting zawnga Advisory Committee hian hma a la chhunzawm anih chuan theihtawp chhuah ve zel pawh kan in huam a ni. Nimahsela tuna kalpui kan tum dan hi chuan keini party chuan tel ve zel na chi ah kan ngai lo,” tiin Advisory Committee atang a an inhnuhdawh thu CM hi an hriattir.