MPCC-in CBI-ah FIR an thehlut

Mizoram Pradesh Congress Committee (MPCC) chuan vawiin (5.2.2026) hian Lengpui leh Sihphira IAF-te hnena ram lei leh hralh dan fel lo tak awmah CBI-te hnenah chhui turin FIR an thehlut tih an tarlang.

MPCC chuan, “He ram lei chungchang hi CBI-te chhuitir ngei kan phut tlat a, chumi bakah an sawi ang ngeiin CBI-te hnenah general consent pe turin kan ngen. February 4, 2026 a Council of Ministers meeting-in Indian Air Force-ten Lengpui leh Sihphir ram an lak chungchang ngaihtuah hoin an sawiho zui nghal a, mipuiten thudik an hriat theih nan hemi chungchangah hian CBI kohluh ni se an ti hi a vanduaithlak hle in kan hria,” an ti.

Sawrkarin Anti-Corruption Branch ah police chhuanawm tak tak a nei reng chungin anni ringzo loin CBI kohluh a ngai an tihnaah hian Home Minister-in a enkawl Home Department chungah rinna an nghat zo lo em ni tia zawhna siamin MPCC chuan, “Mizoram Sorkar hian a duh a nih chuan ACB kaltlangin heng ram lei leh hralhna a sulsutu bera ngaih Henry Lalremsanga Hlawnmual mantang eitute chu a chhuichhuak thei a ni. Hetiang thil chhuichian ngai tihnuhnawh leh tur siin engvangin nge heng ram te hi hmanhmawh taka IAF-in an acquire theih tura hmanhmawh taka hma la nge an nih tih hi kan zawhna a ni,” tiin ZPM Sorkar chu an intiam ang ngeiin February thla ral hma ngeiin CBI hnenah general consent pe leh turin an phut.